מתפללים על כל חייל/ת
אחד על אחד

תהילים לעת מלחמה

כ

א   לַמְנַצֵּחַ מִזְמוֹר לְדָוִד. ב   יַעַנְךָ יְהוָה בְּיוֹם צָרָה    יְשַׂגֶּבְךָ שֵׁם אֱלֹהֵי יַעֲקֹב. ג   יִשְׁלַח-עֶזְרְךָ מִקֹּדֶשׁ    וּמִצִּיּוֹן יִסְעָדֶךָּ. ד   יִזְכֹּר כָּל-מִנְחֹתֶךָ    וְעוֹלָתְךָ יְדַשְּׁנֶה סֶלָה. ה   יִתֶּן-לְךָ כִלְבָבֶךָ    וְכָל-עֲצָתְךָ יְמַלֵּא. ו   נְרַנְּנָה בִּישׁוּעָתֶךָ   וּבְשֵׁם-אֱלֹהֵינוּ נִדְגֹּל יְמַלֵּא יְהוָה    כָּל-מִשְׁאֲלוֹתֶיךָ. ז   עַתָּה יָדַעְתִּי   כִּי הוֹשִׁיעַ יְהוָה מְשִׁיחוֹ יַעֲנֵהוּ מִשְּׁמֵי קָדְשׁוֹ   בִּגְבֻרוֹת יֵשַׁע יְמִינוֹ. ח   אֵלֶּה בָרֶכֶב    וְאֵלֶּה בַסּוּסִים וַאֲנַחְנוּ    בְּשֵׁם-יְהוָה אֱלֹהֵינוּ נַזְכִּיר. ט   הֵמָּה כָּרְעוּ וְנָפָלוּ    וַאֲנַחְנוּ קַּמְנוּ וַנִּתְעוֹדָד. י   יְהוָה הוֹשִׁיעָה    הַמֶּלֶךְ יַעֲנֵנוּ בְיוֹם-קָרְאֵנוּ.

פג

א   שִׁיר מִזְמוֹר לְאָסָף. ב   אֱלֹהִים אַל-דֳּמִי-לָךְ    אַל-תֶּחֱרַשׁ וְאַל-תִּשְׁקֹט אֵל. ג   כִּי-הִנֵּה אוֹיְבֶיךָ יֶהֱמָיוּן    וּמְשַׂנְאֶיךָ נָשְׂאוּ רֹאשׁ. ד   עַל-עַמְּךָ יַעֲרִימוּ סוֹד    וְיִתְיָעֲצוּ עַל-צְפוּנֶיךָ. ה   אָמְרוּ לְכוּ וְנַכְחִידֵם מִגּוֹי    וְלֹא-יִזָּכֵר שֵׁם-יִשְׂרָאֵל עוֹד. ו   כִּי נוֹעֲצוּ לֵב יַחְדָּו    עָלֶיךָ בְּרִית יִכְרֹתוּ. ז   אָהֳלֵי אֱדוֹם וְיִשְׁמְעֵאלִים    מוֹאָב וְהַגְרִים. ח   גְּבָל וְעַמּוֹן וַעֲמָלֵק    פְּלֶשֶׁת עִם-יֹשְׁבֵי צוֹר. ט   גַּם-אַשּׁוּר נִלְוָה עִמָּם    הָיוּ זְרוֹעַ לִבְנֵי-לוֹט סֶלָה. י   עֲשֵׂה-לָהֶם כְּמִדְיָן    כְּסִיסְרָא כְיָבִין בְּנַחַל קִישׁוֹן. יא   נִשְׁמְדוּ בְעֵין-דֹּאר    הָיוּ דֹּמֶן לָאֲדָמָה. יב   שִׁיתֵמוֹ נְדִיבֵימוֹ כְּעֹרֵב וְכִזְאֵב    וּכְזֶבַח וּכְצַלְמֻנָּע כָּל-נְסִיכֵימוֹ. יג   אֲשֶׁר אָמְרוּ נִירְשָׁה לָּנוּ   אֵת נְאוֹת אֱלֹהִים. יד   אֱלֹהַי שִׁיתֵמוֹ כַגַּלְגַּל    כְּקַשׁ לִפְנֵי-רוּחַ. טו   כְּאֵשׁ תִּבְעַר-יָעַר    וּכְלֶהָבָה תְּלַהֵט הָרִים. טז   כֵּן תִּרְדְּפֵם בְּסַעֲרֶךָ    וּבְסוּפָתְךָ תְבַהֲלֵם. יז   מַלֵּא פְנֵיהֶם קָלוֹן    וִיבַקְשׁוּ שִׁמְךָ יְהוָה. יח   יֵבֹשׁוּ וְיִבָּהֲלוּ עֲדֵי-עַד    וְיַחְפְּרוּ וְיֹאבֵדוּ. יט   וְיֵדְעוּ   כִּי-אַתָּה שִׁמְךָ יְהוָה לְבַדֶּךָ עֶלְיוֹן    עַל-כָּל-הָאָרֶץ.

צא

א   יֹשֵׁב בְּסֵתֶר עֶלְיוֹן    בְּצֵל שַׁדַּי יִתְלוֹנָן. ב   אֹמַר לַיהוָה מַחְסִי וּמְצוּדָתִי    אֱלֹהַי אֶבְטַח-בּוֹ. ג   כִּי הוּא יַצִּילְךָ מִפַּח יָקוּשׁ    מִדֶּבֶר הַוּוֹת. ד   בְּאֶבְרָתוֹ יָסֶךְ לָךְ וְתַחַת-כְּנָפָיו תֶּחְסֶה    צִנָּה וְסֹחֵרָה אֲמִתּוֹ. ה   לֹא-תִירָא מִפַּחַד לָיְלָה    מֵחֵץ יָעוּף יוֹמָם. ו   מִדֶּבֶר בָּאֹפֶל יַהֲלֹךְ    מִקֶּטֶב יָשׁוּד צָהֳרָיִם. ז   יִפֹּל מִצִּדְּךָ אֶלֶף וּרְבָבָה מִימִינֶךָ    אֵלֶיךָ לֹא יִגָּשׁ. ח   רַק בְּעֵינֶיךָ תַבִּיט    וְשִׁלֻּמַת רְשָׁעִים תִּרְאֶה. ט   כִּי-אַתָּה יְהוָה מַחְסִי    עֶלְיוֹן שַׂמְתָּ מְעוֹנֶךָ. י   לֹא-תְאֻנֶּה אֵלֶיךָ רָעָה    וְנֶגַע לֹא-יִקְרַב בְּאָהֳלֶךָ. יא   כִּי מַלְאָכָיו יְצַוֶּה-לָּךְ    לִשְׁמָרְךָ בְּכָל-דְּרָכֶיךָ. יב   עַל-כַּפַּיִם יִשָּׂאוּנְךָ    פֶּן-תִּגֹּף בָּאֶבֶן רַגְלֶךָ. יג   עַל-שַׁחַל וָפֶתֶן תִּדְרֹךְ    תִּרְמֹס כְּפִיר וְתַנִּין. יד   כִּי בִי חָשַׁק וַאֲפַלְּטֵהוּ    אֲשַׂגְּבֵהוּ כִּי-יָדַע שְׁמִי. טו   יִקְרָאֵנִי וְאֶעֱנֵהוּ עִמּוֹ-אָנֹכִי בְצָרָה    אֲחַלְּצֵהוּ וַאֲכַבְּדֵהוּ. טז   אֹרֶךְ יָמִים אַשְׂבִּיעֵהוּ    וְאַרְאֵהוּ בִּישׁוּעָתִי.

קכא

א   שִׁיר לַמַּעֲלוֹת אֶשָּׂא עֵינַי אֶל-הֶהָרִים   מֵאַיִן יָבֹא עֶזְרִי. ב   עֶזְרִי מֵעִם יְהוָה   עֹשֵׂה שָׁמַיִם וָאָרֶץ. ג   אַל-יִתֵּן לַמּוֹט רַגְלֶךָ    אַל-יָנוּם שֹׁמְרֶךָ. ד   הִנֵּה לֹא-יָנוּם וְלֹא יִישָׁן   שׁוֹמֵר יִשְׂרָאֵל. ה   יְהוָה שֹׁמְרֶךָ    יְהוָה צִלְּךָ עַל-יַד יְמִינֶךָ. ו   יוֹמָם הַשֶּׁמֶשׁ לֹא-יַכֶּכָּה    וְיָרֵחַ בַּלָּיְלָה. ז   יְהוָה יִשְׁמָרְךָ מִכָּל-רָע    יִשְׁמֹר אֶת-נַפְשֶׁךָ. ח   יְהוָה יִשְׁמָר-צֵאתְךָ וּבוֹאֶךָ   מֵעַתָּה וְעַד-עוֹלָם.

קכד

א   שִׁיר הַמַּעֲלוֹת לְדָוִד לוּלֵי יְהוָה שֶׁהָיָה לָנוּ   יֹאמַר-נָא יִשְׂרָאֵל. ב   לוּלֵי יְהוָה שֶׁהָיָה לָנוּ   בְּקוּם עָלֵינוּ אָדָם. ג   אֲזַי חַיִּים בְּלָעוּנוּ   בַּחֲרוֹת אַפָּם בָּנוּ. ד   אֲזַי הַמַּיִם שְׁטָפוּנוּ   נַחְלָה עָבַר עַל-נַפְשֵׁנוּ. ה   אֲזַי עָבַר עַל-נַפְשֵׁנוּ   הַמַּיִם הַזֵּידוֹנִים. ו   בָּרוּךְ יְהוָה   שֶׁלֹּא נְתָנָנוּ טֶרֶף לְשִׁנֵּיהֶם. ז   נַפְשֵׁנוּ   כְּצִפּוֹר נִמְלְטָה מִפַּח יוֹקְשִׁים הַפַּח נִשְׁבָּר    וַאֲנַחְנוּ נִמְלָטְנוּ. ח   עֶזְרֵנוּ בְּשֵׁם יְהוָה   עֹשֵׂה שָׁמַיִם וָאָרֶץ.

קל

א   שִׁיר הַמַּעֲלוֹת מִמַּעֲמַקִּים קְרָאתִיךָ    יְהוָה. ב   אֲדֹנָי    שִׁמְעָה בְקוֹלִי תִּהְיֶינָה אָזְנֶיךָ קַשֻּׁבוֹת   לְקוֹל תַּחֲנוּנָי. ג   אִם-עֲו‍ֹנוֹת תִּשְׁמָר-יָהּ   אֲדֹנָי מִי יַעֲמֹד. ד   כִּי-עִמְּךָ הַסְּלִיחָה   לְמַעַן תִּוָּרֵא. ה   קִוִּיתִי יְהוָה קִוְּתָה נַפְשִׁי    וְלִדְבָרוֹ הוֹחָלְתִּי. ו   נַפְשִׁי לַאדֹנָי   מִשֹּׁמְרִים לַבֹּקֶר שֹׁמְרִים לַבֹּקֶר. ז   יַחֵל יִשְׂרָאֵל אֶל-יְהוָה    כִּי-עִם-יְהוָה הַחֶסֶד וְהַרְבֵּה עִמּוֹ פְדוּת. ח   וְהוּא יִפְדֶּה אֶת-יִשְׂרָאֵל   מִכֹּל עֲו‍ֹנֹתָיו.

קמב

א   מַשְׂכִּיל לְדָוִד בִּהְיוֹתוֹ בַמְּעָרָה    תְפִלָּה. ב   קוֹלִי אֶל-יְהוָה אֶזְעָק    קוֹלִי אֶל-יְהוָה אֶתְחַנָּן. ג   אֶשְׁפֹּךְ לְפָנָיו שִׂיחִי    צָרָתִי לְפָנָיו אַגִּיד. ד   בְּהִתְעַטֵּף עָלַי רוּחִי   וְאַתָּה יָדַעְתָּ נְתִיבָתִי בְּאֹרַח-זוּ אֲהַלֵּךְ   טָמְנוּ פַח לִי. ה   הַבֵּיט יָמִין וּרְאֵה   וְאֵין-לִי מַכִּיר אָבַד מָנוֹס מִמֶּנִּי    אֵין דּוֹרֵשׁ לְנַפְשִׁי. ו   זָעַקְתִּי אֵלֶיךָ    יְהוָה אָמַרְתִּי אַתָּה מַחְסִי    חֶלְקִי בְּאֶרֶץ הַחַיִּים. ז   הַקְשִׁיבָה אֶל-רִנָּתִי   כִּי-דַלּוֹתִי-מְאֹד הַצִּילֵנִי מֵרֹדְפַי   כִּי אָמְצוּ מִמֶּנִּי. ח   הוֹצִיאָה מִמַּסְגֵּר נַפְשִׁי   לְהוֹדוֹת אֶת-שְׁמֶךָ בִּי יַכְתִּרוּ צַדִּיקִים   כִּי תִגְמֹל עָלָי.

תפילה לשלום חיילי צה”ל וכוחות הביטחון​מִי שֶׁבֵּרַךְ אֲבוֹתֵינוּ אַבְרָהָם יִצְחָק וְיַעֲקֹב, הוּא יְבָרֵךְ אֶת חַיָּלֵי צְבָא הַהֲגַנָּה לְיִשְׂרָאֵל וְאַנְשֵׁי כֹּחוֹת הַבִּטָּחוֹן, הָעוֹמְדִים עַל מִשְׁמַר אַרְצֵנוּ וְעָרֵי אֱלֹהֵינוּ, מִגְּבוּל הַלְּבָנוֹן וְעַד מִדְבַּר מִצְרַיִם, וּמִן הַיָּם הַגָּדוֹל עַד לְבוֹא הָעֲרָבָה [וּבְכָל מָקוֹם שֶׁהֵם], בַּיַּבָּשָׁה בָּאֲוִיר וּבַיָּם.יִתֵּן יְיָ אֶת אוֹיְבֵינוּ הַקָּמִים עָלֵינוּ נִגָּפִים לִפְנֵיהֶם. הַקָּדוֹשׁ בָּרוּךְ הוּא יִשְׁמֹר וְיַצִּיל אֶת חַיָלֵינוּ מִכׇּל צָרָה וְצוּקָה, וּמִכׇּל נֶגַע וּמַחֲלָה, וְיִשְׁלַח בְּרָכָה וְהַצְלָחָה בְּכָל מַעֲשֵׂה יְדֵיהֶם. יַדְבֵּר שׂוֹנְאֵינוּ תַּחְתֵּיהֶם, וִיעַטְּרֵם בְּכֶתֶר יְשׁוּעָה וּבַעֲטֶרֶת נִצָּחוֹן. וִיקֻיַּם בָּהֶם הַכָּתוּב (דברים כ’, ד’): “כִּי יְיָ אֱלֹהֵיכֶם הַהֹלֵךְ עִמָּכֶם, לְהִלָּחֵם לָכֶם עִם אֹיְבֵיכֶם לְהוֹשִׁיעַ אֶתְכֶם”. וְנֹאמַר “אָמֵן”.​​תפילה לשלום והחזרת השבויים והנעדרים​מִי שֶׁבֵּרַךְ אֲבוֹתֵינוּ אַבְרָהָם יִצְחָק וְיַעֲקֹב יוֹסֵף מֹשֶׁה וְאַהֲרֹן דָּוִד וּשְׁלֹמֹה, הוּא יְבָרֵךְ וְיִשְׁמֹר וְיִנְצֹר אֶת נֶעְדְּרֵי צְבָא הֲגַנָּה לְיִשְׂרָאֵל וְאֶת הַשְּׁבוּיִים בְּתוֹךְ שְׁאָר אֲחֵינוּ בֵּית יִשְֹרָאֵל הַנְּתוּנִים בְּצָרָה וּבְשִׁבְיָה. בַּעֲבוּר שֶׁהַקָּהָל מִתְפַּלֵּל בַּעֲבוּרָם, הַקָּדוֹשׁ בָּרוּךְ הוּא יִמָּלֵא רַחֲמִים עֲלֵיהֶם, וְיוֹצִיאֵם מֵחֹשֶׁךְ וְצַלְמָוֶת, וּמוֹסְרוֹתֵיהֶם יְנַתֵּק, וּמִמְּצוּקוֹתֵיהֶם יוֹשִׁיעֵם, וִישִׁיבֵם מְהֵרָה לְחֵיק מִשְׁפְּחוֹתֵיהֶם. “יוֹדוּ לַה’ חַסְדּוֹ וְנִפְלְאוֹתָיו לִבְנֵי אָדָם”. וִיקֻיַּם בָּהֶם מִקְרָא שֶׁכָּתוּב: “וּפְדוּיֵי ה’ יְשׁוּבוּן וּבָאוּ צִיּוֹן בְּרִנָּה וְשִׂמְחַת עוֹלָם עַל רֹאשָׁם. שָׂשׂוֹן וְשִׂמְחָה יַשִּׂיגוּ וְנָסוּ יָגוֹן וַאֲנָחָה” וְנֹאמַר אָמֵן.